Welkom by Saaiplaas Gasteplaas...


Die gastehuis, gele tussen Matjiesfontein en Sutherland, bied n lekker huislike, warm plaashuis-atmosfeer, omring met pragtige Karoo landskappe, damme, lusernakkers, perde, skape, voels en verskeie soorte wildsbokke.

Geniet saans n gesellige kuiertjie by die vuurherd op n bibberkoue wintersaand of ontspan by die lapa op n somersaand en aanskou die hemelruim se helder sterre. Verken die pragtige Karoo plaaslewe te voet, met jou bergfiets of 4x2 of 4x4 voertuig. Hier is maklike asook uitdagende 4x4 roetes van ongeveer 40 km wat u op eie risiko kan beproef. Pragtige uitsig oor die Tankwa Karoo vanaf die berg wat die waterskeiding tussen die Indiese en Atlantiese oseane vorm.

Saaiplaas is die geskikte plek vir n vinnige wegbreek uit die besige stadslewe, slegs 2 en n half uur se ry vanaf die Hugenote tolhek. Die gastehuis is ideaal vir n groep vriende of familie en daar kan tot 13 mense slaap.

Die huis het 5 slaapkamers, n ruim goed- toegeruste kombuis, eetkamer, sitkamer, badkamer met stort en wasbak en aparte toilet en n sonkamer met n vuurherd vir die winter. Daar is een slaapkamer met n dubbel en enkelbed, 1 kamer met n dubbelbed en eie badkamer, nog n kamer met 2 enkelbeddens en eie badkamer, n kamer met 3 enkelbeddens en eie badkamer en n kamer met n driekwartbed. Die huis het Eskom elektrisiteit en buite is 2 braai areas. Reuse populierbome verskaf koelte in die somer.